HISTORIA

Fusiuns, fusiuns…

2006	Suenter dus onns da collaboraziun han ils chors fusiunau. Dapi il 2006 dat ei nies Chor mischedau Rueun-Siat.

Rueun

Fin 2004	Entschatta dalla collaboraziun cul Chor mischedau Siat.
1998	Il Chor viril-cecilian vegn sligiaus.
1995	Gion Tschuor surpren la bitgetta. Commembras e dirigent decidan che lur chor seigi dacheudenvi puspei mischedaus: quei ei la naschientscha dil “niev” Chor mischedau Rueun.
1993	Per l’emprema ella historia da Rueun ha ei dau in chor diltut feminin, pertgei ussa han las cantaduras dil chor Aurora era in dirigenta, Christina Cadalbert.
1992	A Rueun ei vegniu festivau: Fiasta da giubileums 75 onns Societad da musica e 90 onns Chor viril-cecilian.
1976	Sut la direcziun da Rest Gieri Tschuor ei il chor vegnius battegiaus: chor Aurora.
1964	Il Chor mischedau ei daventaus in Chor da dunnauns e mattauns. La raschun tenor il cudisch da protocol: plirs cantadurs “hagien midau clamada”. Sep Antoni Curschellas dirigeva il chor.
1927	In Chor mischedau vegn fundaus. Quel cultivava sper il cant sacral era in repertori profan, quei ch’il Chor viril-cecilian fageva da lezzas uras mo a caschuns internas. Il Chor mischedau vegneva dirigius da Sep Antoni Curschellas. Fotografia: Ina dallas veglias fotografias muossa co il Chor mischedau sepresenta igl onn 1933 alla fiasta da cant a Flem.
1902	Fundaziun dil Chor viril-cecilian. Duront bien in tschentar d’existenza ha il chor giu mo treis dirigents: Gion Duff Cadalbert (tochen 1920), Albert Cadalbert (tochen il 1970!) e Michael Cavigelli (tochen 1998).

Siat

2004	Gion Tschuor ha surpriu la direcziun dil Chor mischedau Siat – el diregia pia dus chors. Alla radunonza dils 23 d’october 2004 ha il Chor mischedau Siat decidiu da far ina damonda da collaboraziun al Chor mischedau Rueun.
1985	Duas dunnas han priu enta maun il chor: Cresenzia Cavigelli sco presidenta e Rosita Casutt sco dirigenta. Il chor dumbrava lu 30 commembers. Ord las retschas dil Chor mischedau ei era seformaus in Chor da dunnas che ha il pensum d’embellir messas da nozzas, sepulturas e firaus. Quei chor exista aunc oz.
1984-85	Ils temps ein buc adina stai sempels per il Chor mischedau – duront quei onn ha el buca cantau muort munconza da commembers, d’in(a) president(a) e d’in dirigent(a).
1971	Tochen ils 30-01-1971 ha ei dau a Siat in chor viril – perquei ch’ils vegls cudischs da protocol ein buca pli avon maun, san ins buc exact cu il chor era vegnius fundaus. Fundaziun dil Chor mischedau, quei muort munconza da commembers el Chor viril. Tier enqual commember dil chor viril ha quella midada dau empau malaveglia aschia ch’entgins ein buc entrai el Chor mischedau… In interessant passus ord il protocol dalla radunonza: “La cassa (facultad) duei suenter 5 onns ir vi al chor ch’exista aunc! Ils tscheins dalla facultad van per quei temps al fondo per renovar la caplutta da s. Glieci.”