BRISCHA, STRIA!

Premiera: ils 27 d’october 2001
Derniera: ils 11 da november 2001

Halla polivalenta Rueun

Quei musical raquenta dil temps dalla persecuziun da strias el 17/18avel tschentaner. El descriva las anguoschas che quei temps ha derasau en vitgs e vallada, co oravontut dunnas ein vegnidas supprimidas e torturadas a moda sgarscheivla, co entiras famiglias han pitiu sut ils pussents che representavan il dretg.

Chor mischedau Rueun
formaziun d’orchester ad hoc
fetg biars gidonters

Idea e cumposiziun: Gion Tschuor
Direcziun e reschia: Gion Tschuor

Nus havein saviu schar mo dus onns la detta dad in musical. Ils effects positivs da „Sergej ed Onna“ han motivau nus e nies dirigent da puspei presentar in project da gronda dimensiun, quei puspei grazia al sustegn e la collaboraziun digl entir vitg. Varga tschien persunas han dau tut per che „Brischa, stria!“ daventi in grond success sco „Sergej ed Onna“. Rueun daventa la capitala mundiala dil musical! Broadway da New York? Who cares!

Cuntegn

Anna Florin (Ursula Brändli Capaul) ei ina dunna da curonta onns attractiva ed intelligenta. Ella ei mumma da tschun affons e dapi entgins onns vieua. Per saver nutrir sia famiglia lavura ella denter auter sco fumitgasa tier gerau e premderschader Barclamiu Nut (Alberto Palaia). La famiglia Nut ei da derivonza nobla e fetg beinstonta. Cun pussonza e direzia, cun squetsch e cun tementar contonscha Barclamiu Nut tut quei ch’el vul. El garegia era Anna.

Anna ei ina dunna da niebel caracter, mo ella drova era il gudogn per saver nutrir sia famiglia. Malgrad il grond squetsch dil gerau e premderschader resta ella denton ferma e renviescha Barclamiu. Quel pren vendetga e denunzia Anna sco stria.

Barclamiu ei accusader e derschader, ed il destin da Anna Florin para definitivs ella sentenzia da Nut: „Brischa, stria!“ El e ses socis, il plevon ed ils conderschaders, decidan da veta e mort. Mo als affons da premderschader Nut, Tresa (Manuela Caduff) e Clau (Conrad Schlosser), reussescha ei cul sustegn digl entir vitg da spendrar Anna dil caset e da scatschar Barclamiu Nut e sia suita ord vitg e vallada.

„Va ali giavel!“