SERGEJ ED ONNA

Premiera: ils 6 da november 1999
Derniera: ils 14 da november 1999

Halla polivalenta Rueun

En memoria alla retirada dallas truppas russas sur il Veptga ed all’occupaziun dils vitgs al pei dil pass tras la schuldada da general Alexander Suvorov

1799-1999

Chor mischedau Rueun
formaziun d’orchester ad hoc
biars gidonters

Idea e cumposiziun: Gion Tschuor
Direcziun e reschia: Gion Tschuor

Biars han tertgau che nies bien Gion seigi scarpitschaus sur in cabel dad ina camera el studio dil Telesguard ed hagi pitgau il tgau sil pei dil stativ. La primavera dil 1999 propona el a nies chor da far in musical. – In musical? – Halooo!?!  – Tgi essan nus? In ensemble dil Broadway da New York?

Ei suondan in pèr meins ruaus. Il musical para emblidaus.

Egl uost mein nus tut patgific all’Arena da Verona per mirar „Madame Butterfly“. E pren mira: Avon l’entrada dall’Arena pren nies bien Gion ord sia tastga il libret cul tetel „Igor e Mariuschla“, ni enzatgei semegliont. Nus fagein definitivamein in musical – e vein treis meins per realisar e finanziar quel. Jippijaje!

Cuntegn

Sergej (Conrad Schlosser), in giuvenot spir veta, passenta sia giuventetgna cun ses socis a Dubna, in vitg en Russia. Ensemen fan els enqual cattavegna e vilentan oravontut las dunnauns e mattauns. Quella idilla ha denton ina fin abrupta. Ell’Europa dat ei uiara. Ils Russ cumbattan encunter la Frontscha da Napoleon. Ord quei motiv ston era Sergej e ses cumpogns sut las armas.

El medem temps, 3000 km  en direcziun sera, van ils habitonts da Rueun gi per gi alla lavur, aschia era la giuvna Onna (Manuela Caduff). Marcadonts dalla Lombardia vegnan sur il Lucmagn per cuntinuar lur via  sur il pass Pigniu encunter Turitg. Els portan las novitads da tgei che cuora e passa el mund.

La fin settember 1799 entscheivan las truppas russas cun la surmuntada dallas Alps. Suenter ver scatschau ils Franzos dall’Italia dil nord, duein las truppas da Suvorov cun 21’000 schuldai marschar encunter Turitg per batter encunter las divisiuns dil general franzos Masséna. Ils Russ conquistan il pass dil Gottard e contonschan il Muotatal. A Turitg ha Masséna denton battiu las truppas da Rimski-Korsakov e Suvorov decida da seretrer. Ils Russ vegnan sur il pass Pigniu.

Per Suvorov e ses umens daventa quellla surmuntada in nausch siemi. Pli dira che la lutga encunter ils Franzos daventa quella encunter ils cuolms, encunter neiv e ferdaglia, vallatschas e preits-crap. Horrenta ei la traversada dalla Val Scalina e la surmuntada dil Veptga, sco il pass Pigniu vegn era numnaus. Era Sergej pitescha e vegn grevamein malsauns. Siu meglier amitg Alexei (Alberto Palaia) gida denton el, ed els contonschan cun las davosas forzas la finfinala Rueun.

A Pigniu e Rueun vegnan ils indigens surpri da tuttenina esser involvai directamein en in conflict che pareva lunsch naven. Sergej ed Onna sentaupan. Onna tgira il giuven Russ, ed ord la criua e tresta realitad dall’uiara nescha in’amur, denter in giuven russ ed ina giuvna da Rueun.

Cпаcибо